Mukha ng sekyu wakwak sa bote

WASAK ang kaliwang bahagi ng mukha ng isang security guard matapos saksakin ng  basag na bote  sa mukha ng kanyang kaaway sa Suter St., Sta. Ana, Maynila kamakalawa.

Unang dinala sa Sta. Ana Hospital ngunit pinayuhan ng mga doktor na ilipat sa Philippine General Hospital (PGH), ang biktimang si Glen Rodriguez, 32, security guard, residente sa nasabing lugar.

Mabilis namang nakatakas ang suspek na itinurong isang Marnel Gaboy, kapitbahay ng biktima.

Ayon kay Supt. Fernando Opelanio, hepe ng Manila Police District Sta. Ana police (PS 6), naganap ang insidente dakong 9:00 p.m. sa nabanggit na lugar nang tanggalin ng biktima ang andamyo na  ginawang daanan ng mga residente habang ginagawa ang kalsada.

Napaga-alaman na sinaway umano ng suspek ang biktima sa ginawang pagtanggal sa kahoy kaya bagtalo ang dalawa hanggang magsuntukan.

Tinangka umano ng mga kapitbahay na awatin ang dalawa pero hindi nagpaawat hanggang makadampot ng basag na bote ng alak saka isinaksak sa mukha ng biktima dahilan para mawakwak ang kaliwang bahagi nito.

Leonard Basilio