Kagawad todas sa tandem

VIGAN CITY – Agad binawian ng buhay ang isang barangay kagawad makaraan pagbabarilin ng riding in tandem sa Brgy. 4, Bantay, Ilocos Sur kamakalawa.

Kinilala ng mga awtoridad ang biktimang si Florentino Rola, 54, ng Brgy. Nagtupacan, San Vicente.

Ayon sa imbestigasyon ng Bantay-PNP sa pangunguna ni chief of police, Chief Insp. Greg Guerero, tutungo sana sa Vigan City ang biktima kasama ang asawa upang umangkat ng mga isda na ititinda nila, nang napansing may naka-motorsiklong sumusunod sa kanila.

Pagdating nila sa bayan ng Bantay partikular sa nasabing barangay, agad inabangan ng mga suspek ang biktima.

Maswerteng hindi nasaktan ang asawa ng biktima, na ngayo’y labis na naghihinagpis dahil sa nangyari.