Sanggol dedbol sa adik na ama

PINAGLALAMAYAN na ang isang 6-buwan gulang na sanggol makaraan patayin ng adik na ama kamakalawa ng hapon sa Brgy. Binagbag, Angat, Bulacan.

Sa ulat mula sa Angat police, arestado ang suspek na si Fernan Varilla Visconde makaraan patayin ang sanggol na anak sa pamamagitan ng pagpigil sa paghinga ng biktima.

Ayon kay Inspector Nestor Bautista, deputy police chief ng naturang bayan, nakita ng mga kapitbahay si Visconde habang karga-karga ang anak na noon ay nakangiti ngunit pagkaraan ng ilang minuto ay pinindot-pindot ang ilong ng biktima hanggang hindi na makahinga at mamatay.

Inamin ng suspek ang pagpatay sa sanggol makaraan masakote sa kanyang bahay sa Sitio Maiboy sa naturang barangay.

Ayon sa suspek, hindi ito ang unang pagkakataon na tinangka niyang patayin ang anak.

Bukod sa pagiging sugapa sa droga, hinihinalang dahil sa hindi nila pagkakaunawaan ng kanyang misis ang motibo sa pagpatay sa sanggol.

Micka Bautista