Pribilehiyo nina Enrile, Jinggoy balik na

BALIK na ang privileges nina Sen. Juan Ponce Enrile at Sen. Jinggoy Estrada bilang senador makaraan mapagsilbihan ang 90-day suspension order na ipinataw ng Sandiganabayan bunsod ng kinakaharap na kasong plunder kaugnay ng pagkakasangkot sa kontrobersiyal na multi-billion peso pork barrel scam.

Nagtapos ang suspension order laban kay Enrile noong Nobyembre 28, habang Nobyembre 29 kay Estrada.

Gayonman, mananatili pa rin nakakulong ang dalawa sa PNP custodial center sa Kampo Crame.

Ayon kay Senate President Franklin Drilon, pwede na muling maghain ng panukalang batas at resolusyon sina Enrile at Estrada at tumanggap ng kanilang sahod bilang senador ngayong lifted na ang kanilang suspension order.

Sa ngayon, tanging si Sen. Ramon Revilla na lamang ang kasalukuyang nakasuspende hanggang mapagsilbihan ang 90 day suspension order na matatapos sa Enero ng susunod na taon.

Niño Aclan/Cynthia Martin