Namulot ng barya ulo ng bata pisak sa truck

PATAY ang isang 9-anyos batang lalaki makaraan magulungan ang kanyang ulo ng truck nang hindi mapansin ng driver habang namumulot ng barya sa kalsada kamakalawa ng hapon sa Valenzuela City.

Agad binawian ng buhay sa insidente ang biktimang si

Marjon Pamintuan, 9, residente ng T. Santiago St., Brgy. Dalandanan ng nasabing lungsod.

Habang kusang-loob na sumuko sa mga awtoridad ang driver ng 20-footer Isuzu Cargo Truck (XKP-489) na si Jaymar Palatao, 24, naninirahan sa Sitio 2, Gumamela St., Antipolo City.

Base sa ulat ng Traffic Enforcement Group (TEG) ng Valenzuela City Police, naganap ang insidente dakong 2 p.m. sa panulukan ng McArthur Highway at T. Santiago St., Brgy. Dalandanan.

Tinatahak ng suspek ang kahabaan ng T. Santiago St. ngunit pagdating malapit sa kanto ng McArthur ay hindi niya napansin ang biktima na namumulot ng barya sa kalsada.

Inakala ng suspek na bato ang kanyang nasagasaan at nabatid lamang na bata nang sumigaw ang mga residente sa lugar.

Rommel Sales