HATAW! D'yaryo ng Bayan hatawtabloid.com
BINATIKOS kahapon ng isang senior member of the Commission on Election (Comelec) ang isang dating Comelec official na itinalaga noong Arroyo administration sa pagkakalat ng haka-haka na minanipula ang automated elections noong 2013.
Sinabi ni Commissioner Lucenito Tagle na nananaginip nang gising si Melchor Magdamo na nagsabing ang precinct count optical scan (PCOS) machines ay naka-pre-programmed para sa sistematikong ‘dagdag-bawas.’
“Kasinungalian at malaking kalokohan iyang sinasabi ni Magdamo. Paanong magkakaroon ng dagdag-bawas kung aniya’y naka-program na nga?” sabi ni Tagle.
Ayon kay Magdamo, executive assistant ng dating Comelec chairman na si Jose Melo, “malamang nadugasan ng boto sina Koko Pimentel at brother Eddie Villanueva.”
Nakita umano ang hinihinalang “electronic fraud” ng isang grupo ng information technology experts mula sa Department of Science and Technology (DOST) sa isinagawang random audit, ayon kay Magdamo.
Mariing pinabulaanan ni Tagle ang kuwento ni Magdamo dahil nanalong pang-walo si Sen. Aquilino “Koko” Pimentel III samantala pang-19 si Villanueva.
Hindi kailanman nagsumite ng report ang sinuman mula sa DOST at hindi rin nagprotesta si Pimentel o Villanueva, paglilinaw ni Tagle.
Ang Liberal Party guest candidate na si Grace Poe na nag-top sa senatorial race at nakatanggap ng 20,337,327 votes ay hindi naman nakatanggap ng bintang na nandaya.
“Diyan malinaw na makikita na basura lamang ang mga haka-haka na inire-recyle ng mga gustong sumulot sa Smartmatic. Bakit hindi na lamang sumali sa bidding ang mga ‘yan at ibida ang kanilang teknolohiya?” sabi ni Tagle.
Si Pimentel mismo ang nagsabing walang napatunayan sa mga alegasyon ng pandaraya gamit ang PCOS.
Ang Smartmatic Philippines ay isa sa mga sasali sa Comelec bidding sa P2-billion contract para sa supply ng 23,000 ng additional voting machines para magamit sa 2016 national elections.
Hinamon ni Comelec Chairman Sixto Brillantes Jr. ang mga kritiko ng PCOS machines na “i-showcase ang kanilang produkto at magbigay ng best offer.”
(ERA)
