HATAW! D'yaryo ng Bayan hatawtabloid.com
CEBU CITY – Kasong parricide ang kinakaharap ng 18-anyos ina makaraan maihagis ang kanyang isang taon gulang na sanggol nang maalimpungatan mula sa mahimbing na pagtulog sa Gen. Luna St., Pob. II, Carcar City, Cebu kamakalawa.
Nakapiit sa Carcar City Police ang ina na si Catherine Alinsugay Tulod, ng Gen. Luna St., Poblacion 11, Carcar City.
Ayon kay PO2 Camia Codo, mismong ang 16-anyos kapatid ng suspek na si Ronil Tulod ang nagsumbong sa mga awtoridad sa insidente.
Sinabi ni Tulod, ginising niya ang suspek para pasusuhin ang anak dahil iyak nang iyak ngunit laking gulat nang bigla na lamang nagalit, at naihagis ang walang muwang na paslit.
Tumama ang ulo ng bata sa pintuan kaya agad dinala sa Carcar City District Hospital ngunit namatay.
Nakatakdang isailalim sa psychological assessment ang nasabing ina para alamin kung may problema sa pag-iisip.
Beth Julian
