The Condo King

HINDI lang pala overpriced, hacienda at bidding-biddingan king, pwede na rin palang tawaging ‘condo king’ si Vice President Jejomar Binay batay sa mga inihayag ni dating Makati Vice Mayor Ernesto Mercado sa Senate hearing.

Ayon kay Mercado, hindi lang umano sa overpriced building at bidding-biddingan namumunini ang mga Binay.

Gumagamit din umano ng dummies ang mga Binay para sa condominium units na bahagi ng ‘extortion activities’ sa mga property developers sa Makati.

Ayon kay Mercado, mahabang panahon na ang pamilya ni VP Binay ay pinaniniwalaang mayroong mga pag-aaring unit sa bawat condominium development sa Makati City.

Aniya mayroon siyang alam na anim na condo units na pag-aari ng mga Binay pero nakarehistro sa pangalan ng kanyang mga dummy.

Tinukoy ni Mercado ang isang 150-square meter unit sa The Peak Condominium sa Salcedo Village na nakapangalan sa isang Ariel Olivar.

Si Olivar umano sng surveyor ni Binay para sa 150 hanggang 350 ektaryang hacienda sa Rosario, Batangas.

Inamin umano ito ni Olivar sa isang sworn statement na ipinaabot sa kanya sa isang taong hindi niya kilala. Inamin umano ni Olivar na ang nasabing condo unit ay kay Binay at hindi sa kanya.

Ayon kay Mercado, sa nasabing unit siya pinayagang umokupa noong 2001.

Sa ulat, sinabing doon natagpuang patay ang kinakasama ni Mercado na sinabing anak ng komedyanteng si Babalu

Bukod sa The Peak, mayroon din umanong pag-aari si Binay na 129.92 square meter unit sa Le Triomphe condo sa Salcedo Village na nakarehistro sa isabf Celso Santiago na sinabing tiyuhin ng kanyang misis.

Nariyan rin umano ang unit sa Makati Sunrise Towers Hotel, Berjaya Hotel ngayon sa Makati Avenue na nasa pangalan din ni Santiago.

Ikaapat ang unit sa Perla Compania de Seguros Mansion Condotel sa Legazpi Village, sa pangalan ni Benjamin Zapanta, ang may-ari ng na nakakuha ng maraming projects mula sa city government ng Makati.

Panglima ‘yung sa Prince Plaza II Condotel sa kanto ng Legazpi, Dela Rosa at Gallardo Sts., sa pangalan ni Santos F. Panlilio, ang paborito umanong contractor ni Binay sa Makati City bago ang Hilmarc’s Cons-truction Corp.

Ika-anim ang 324-square meters sa Avignon Tower sa Salcedo Village, sa pangalan ni Aurora Panlilio, ang asawa ni Santos Panlilio.

Ibinenta na umano ang nasabing unit sa halagang P25 milyon.

Ayon kay Mercado, maraming developers ang lumapit sa kanya at nag-alok pa umano ng kuwarta para ipagpatuloy ang paglalantad sa mga katiwaliang kinasasangkutan ng mga Binay.

Hinikayat niya umano ang nasabing mga developer na lumantad at magpahayag ng kanilang mga nalalaman at karanasan sa mga Binay pero nangangamba umano sa kanilang kaligtasan.

‘Yun lang!

‘E kailan naman paninindigan ng mga deve-loper na ‘yan na may ‘yagbols’ sila kung ayaw nilang lumantad?!

Tsk tsk tsk … nagbanta na ang ‘hari ng mga nuno sa punso,’ tantanan na siya dahil kung hindi, may kalalagyan ang mga nag-aakusa na siya’y magnanakaw.

Habang umuupak naman ang Binays’ spokespersons na ilalantad ang baho at eskandalo ng kanyang mga detractor.

‘Yan ang aabangan ng madlang pipol, ang umiinit na issue sa yaman ni Binay!