2-anyos patay, 7 sugatan sa karambola ng 3 sasakyan

PATAY ang isang 2-anyos batang lalaki habang pito ang sugatan nang tumbokin ang sinasakyan nilang tricycle ng isang armored van at pagkaraan ay nasalpok ng mini bus sa Covelandia Road, Bgy. Kanluran-Binakayan, Kawit, Cavite kamakalawa.

Namatay habang isinusugod sa ospital ang 2-anyos biktimang si Jaspher Balitostos habang sugatan sina Roger Postre, 27; Jezalyn Francisco, 27; Jerlyn Postre, 7; Sheena Balitostos, 32; John Aliba, 4, at Dominador Guana, 79, pawang ng Brgy. Samala-Marquez, Binakayan, Kawit, Cavite.

Dakong 11:30 a.m., sakay ang mga biktima ng tricycle (for registration) na minamaneho ni Postre, nang mula sa likuran ay tinumbok sila ng rumaragasang Armored Van (ZHM-274) ng Safeguard Armor Security Corp. na minamaneho ni Dindo Mandapiton, 37.

Sa lakas ng impact, napalipat ang tricycle sa kabilang linya ng kalsada at hindi sila naiwasan at nasalpok ng mini bus (DVA-640) na minamaneho ni Emmanuel Ravelo, 40.

Beth Julian