HATAW! D'yaryo ng Bayan hatawtabloid.com
KINUWESTIYON ni retired Maj. Gen. Ramon Montano ang pagpayag ni Bangko Sentral ng Pilipinas Governor Amando Tetangco Jr. sa maanomalyang pag-iisyu ng shares of stocks sa mga hindi kuwalipikadong indibidwal at pagkakahalal nila sa Board of Directors ng Philippine Veterans Bank (PVB).
Nilinaw ni Montano na dapat pangalagaan ni Tetangco ang nakasaad sa batas na tanging ang mga beterano at ang kanilang mga asawa at anak ang maaaaring mag-ari ng shares of stock sa PVB at sinampahan na nila sa Veterans Federation of the Philippines (VFP) ng Plunder sa Office of the Ombudsman ang mga nagkasalang opisyal ng VFP sa ilalim ni ret. Col. Emmanuel de Ocampo na halos 30 taong presidente ng pederasyon.
Nitong nakaraang Setyembre 18, sinuportahan naman ng mga charter members ng VFP at mga lider ng mga samahang beterano sa pangunguna ni Defenders of Bataan and Corregidor Inc. National Commander Atty. Rafael Evangelista ang pagkilos ni Secretary of National Defense Voltaire Gazmin para sa kinakailangang reporma sa VFP sa pamamagitan ng bagong constitution and by-laws (CBL).
Ayon naman sa anak ng beteranong si Carling Galvez ng Bulacan, napansin nilang naghihinay-hinay si Sec. Gazmin sa kaagad pagpapatupad ng bagong CBL upang mabigyan ng pagkakataon ang grupo ni De Ocampo na maipaliwanag ang mga isyu at maharap nila ang kasong Plunder sa Ombudsman.
“Mas importanteng isyu sa PVB kung ano ang nangyari sa 20 porsiyentong net income na napunta sa Board of Trustees of Veterans of World War II (BTVWWII) na chairman si Col. Emmanuel de Ocampo,” ayon kay Cecilio Galvez. “Walang malinaw na accounting kung ano ang nangyari sa pondo at may pagsisiyasat na sa Kongreso kaugnay ng mahigit P900 milyong na-remit sa grupo ni De Ocampo.”
Bukod kay Evangelista, lumagda sa manipesto ng buong pagsuporta kay Gazmin sina PEFTOK Veterans Association Inc. president ret. Col. Paterno Viloria, USAFIP-Northern Luzon president Brig. Gen. Arnulfo Banez, Magsaysay Veterans Legion president Cmdr. Ricardo Madayag, Gold Star Mother and United Widows and Orphans Association of the Phils. Col. Juanito Recio, AFP Retired Veterans Association president ret. Col. Simplicio Duque, Philippine Vetrans Legion president Capt. Marlon Dantes and Fil-American Irregular Troops, Inc. Veterans Legion national president Cmdr. William Pasiwen.
