HATAW! D'yaryo ng Bayan hatawtabloid.com
TINANGGAL na ng Racal Motor Sales si Jinino Manansala bilang head coach ng Alibaba sa ginaganap na PBA D League Aspirants Cup.
Nagdesisyon ang pamunuan ng Racal na sibakin si Manansala dahil sa 0-3 na karta ng Alibaba sa torneo.
Papalit kay Manansala si Caloy Garcia na assistant coach ng Rain or Shine sa PBA at head coach ng Letran sa NCAA.
Dahil sa pagsibak kay Manansala ay tinapos ng Racal ang school tie-up nito sa St. Clare College sa National Athletic Association for Schools, Colleges, and Universities (NAASCU) kung saan head coach siya roon.
Dating nag-coach si Garcia sa Hogs Breath Cafe.
Samantala, lalaro na ang Fil-Tongan na si Moala Tautuaa para sa Cagayan Valley sa susunod na laro ng Rising Suns kontra Cafe France sa susunod na Huwebes.
Napili si Tautuaa bilang top pick sa D League rookie draft ngunit tinapos muna niya ang paglalaro sa Malaysia Dragons sa ASEAN Basketball League kung saan natalo sila sa finals kontra Hi Tech Bangkok City .
Si Tautuaa ay isa sa mga inaasahang magiging top pick sa PBA Rookie Draft sa 2015.
Nangunguna ngayon ang Rising Suns sa team standings ng Aspirants Cup na may tatlong sunod na panalo kasama ang Bakers at Hapee Toothpaste. (James Ty III)
