12-anyos nene nagsilang ng sanggol

AKLAN – Nagsilang ang isang 12-anyos dalagita ng isang sanggol na lalaki nitong Nobyembre 3 sa Dr. Rafael S. Tumbokon Memorial Hospital sa Kalibo, Aklan.

Ayon sa pamilya ng dalagita, hindi nila batid na buntis pala ang kanilang anak.

Anila, inakala nilang lumusog lamang ang dalagita.

Sinabi ng ina ng dalagita, dinala nila sa albularyo ang anak dahil sa idinaraing na pagsakit ng tiyan.

Sinabi umano ng albularyo na may tumor sa tiyan ang dalagita.

Ngunit nang dalhin nila sa ospital ang dalagita ay nabatid nilang walong buwan nang buntis.

Wala pang ideya ang pamilya kung sino ang ama ng sanggol.

Kasalukuyan nang nag-iimbestiga ang Wo-men and Children’s Protection desk ng Kalibo Police upang mabatid kung sino ang ama ng sanggol na kasalukuyang nasa intensive care unit ng ospital dahil isinilang na ‘premature.’