Gloria humirit ng 9-day house arrest (Para sa burol ng apo)

HINILING ni dating Pangulo at ngayo’y Pampanga Rep. Gloria Macapagal-Arroyo na pansamantalang makalabas ng Veterans Memorial Medical Center (VMMC) para makadalaw sa burol at makadalo sa libing ng apo.

Nitong Linggo ng umaga ay pumanaw habang nasa Philippine Heart Center ang 1-taon gulang na apo ni Arroyo sa anak na si Luli.

Sa inihaing mosyon ni Laurence Hector Arroyo, abogado ng dating pangulo, hiniling ng akusado sa Sandiganbayan First Division na siyam araw siyang ma-house arrest sa kanyang tahanan sa La Vista, Quezon City simula Nobyembre 3 hanggang Nobyembre 12, at araw-araw na makadalo sa burol ng apo sa Forbes Park sa Makati City, gayon din pati sa libing.

Nakasaad sa mosyon na hindi flight risk si CGMA at wala siyang planong tumakas.

Dakong 8:30 ngayong umaga itinakda ang pagdinig ng korte sa hirit ng dating pangulo.