Shabu ibinayad sa isinanlang CP

GENERAL SANTOS CITY – Laking gulat ng isang lalaki nang bayaran siya ng isang sachet ng shabu sa isinanla niyang cellphone sa isang tricycle driver.

Ayon sa nagreklamong si Jones Parsis, 34, residente ng Zone 4, Blk. 2, Brgy. Lagao sa lungsod ng Heneral Santos, isinanla niya ang kanyang cellphone sa tricycle driver na si alyas Dodong sa halagang P500.

Ngunit nagulat siya nang makitang isang sachet ng shabu at hindi pera ang iniabot sa kanya ni Dodong kaya’t agad niyang ibinalik sa naturang driver sabay bawi ng kanyang cellphone.

Agad niyang ini-report ang insidente sa Lagao Police Station ngunit nang magresponde ang mga pulis ay hindi nila inabotan ang tricycle driver na napag-alamang dati nang nahuli sa raid kaugnay sa illegal na droga ngunit nakalaya nang maglagak ng piyansa.

Sa ngayon, pinaghahanap ng mga awtoridad ang nasabing tricycle driver.