HATAW! D'yaryo ng Bayan hatawtabloid.com
UNTI-UNTING NAPAPATUNAYAN NI EDNA ANG BIRTUD NG PANYONG PUTI NI LOLO PRIMO
Ang mga mata ay parang sa isang mabangis na tigre na ibig manlapa ng bibiktimahin. Pero nang makita nito ang panyong puti na nakatali sa kanyang leeg ay bigla na lang nagpumiglas sa kamay ng yaya-kasambahay. At nagtatakbong pabalik sa sariling silid sa itaas ng bahay.
“Me sumpong ‘ata…” nasabi ni Shane patungkol kay Tony Boy.
“Baka tinatamad nang magpa-tutor,” hula naman ni Karl.
Pero iba ang nasa isip ni Edna. Pakiramdam niya ay takot lumapit sa kanya ang batang lalaki.
“Tama si Lolo Primo… Pati diyablo ay mangingilag sa taglay na kapangyarihan ng panyong ipinagkaloob niya sa akin,” hinuha niya.
Pinalipas lang ng dalagang guro ang isang araw at minsan pa niyang iniyapak ang mga paa sa bahay ng mag-asawang Karl at Shane. At pagdating niya roon ang kusi-nera na naman ang nagbukas sa kanya ng pintuan.
“Puyat sina Ate at Kuya… Kauuwi lang galing sa ospital…” bungad kay Edna ng kusinera.
“Anong ginawa ng mag-asawa sa ospital?”
“Isinugod du’n si Bebang… Nanganak na kaninang madaling-araw, e…”
At ganito ang nasagap kwento ni Edna sa tsismosang kusinera patungkol sa pa-nganganak ng yaya-kasambahay sa ospital:
“Lumobo nang lumobo ang tiyan ni Bebang sa pagbubuntis na parang nakalunok ng dalawang malalaking pakwan. Kagampanan nga niya kagabi kaya isinugod sa ospital nina Ate Shane at Kuya Karl. Patay na raw ang sanggol nang mailuwal. Pero alam mo ba kung ano’ng itsura nu’ng siyam na buwan na dinala sa sinapupunan ni Bebang? Diyuskupuuu! Lunung-luno raw na mistulang gelatin na umagas sa kanyang pwerta!”
Na-shock si Edna.
Naidaldal na rin sa kanya ng kusinera na pauuwiin na raw nina Karl at Shane sa probinsiya ang yaya-kasambahay paglabas nito ng pagamutan.
“Balik ka na lang po bukas, Miss Edna…” payo sa kanya ng kusinera.
“E, si Tony Boy?” pangungumusta niya sa batang tinuturuan. (Itutuloy)
