Tigil-pasada ikinasa ng piston (Protesta sa malaking multa)

KASADO na ang malawakang kilos-protesta at tigil-pasada ng mga pampasaherong jeepney, tricycle, UV Express Service at taxi ngayong Lunes.

Ayon sa PISTON, ito’y bilang pagtutol nila sa Joint Administrative Order (JAO) ng Department of Transportation and Communications (DoTC), Land Transportation Franchising and Regulatory Board (LTFRB) at Land Transportation Office (LTO) na nagpapataw nang mas malaking multa sa ko-lorum na mga sasakyan.

Ayon kay PISTON National President George San Mateo, magsasagawa ng tigil-pasada ang kanilang mga miyembro sa Cagayan de Oro, Iligan City, Bukidnon, Misamis Oriental at Surigao del Norte.

May mga kilos-protesta rin aniya sa Metro Manila, Laguna, Albay, Iloilo, Bacolod, Cebu, Northern Minda-nao, General Santos City at Davao City.

Sa Metro Manila, dakong 5 a.m. magsisimula ang pagkilos sa Alabang, Monumento sa Caloocan, Roxas Boulevard sa Pasay, Novaliches at Cubao sa Quezon City.

Dakong 10 a.m. tutulak sila sa tanggapan ng LTFRB at LTO sa East Avenue, Quezon City.

Ihihirit ng PISTON na suspendihin at tuluyang ipawalang-bisa ang JAO na isa umanong money making scheme.

Matatandaan, Hunyo nang ipatupad ang JAO na nagtatakda ng multang aabot sa P1 milyon para sa mga bus.

Habang nagbabala ang LTFRB na mahaharap sa parusa ang mga lalahok sa tigil-pasada.

(HNT)

MMDA may libreng-sakay vs tigil-pasada

MAY libreng sakay ang Metropolitan Manila Development Authority (MMDA) sa mga biyahe-rong maaapektohan ng malawakang kilos-protesta at tigil-pasada ng ilang pampublikong sasakyan ngayong Lunes.

Ayon sa transport group na Pagkakaisa ng mga Samahan ng Tsuper at Operators Nationwide (PISTON), hindi papasada ang ilang driver ng jeep, tricycle, UV Express Service at taxi sa Metro Manila, Laguna, Albay, Iloilo, Bacolod, Cebu, Northern Mindanao, General Santos City at Davao City.

Dahil dito, nakaantabay na sa tanggapan ng MMDA ang mga trak na gagamitin para ihatid nang libre ang maaabalang mga pasahero.

Pakiusap ni MMDA Chairperson Francis Tolentino sa mga lalahok, huwag pwersahin ang ibang tsuper na sumama sa protesta.

Jaja Garcia

Tanggal-prangkisa suportado ng palasyo (Sa lalahok sa protesta)

SUPORTADO ng Palasyo ang babala ng Land Transportation Franchising and Regulatory Board (LTFRB) na tatanggalan ng prangkisa ang mga lalahok sa transport strike ngayon.

Ayon kay Communications Secretary Herminio Coloma, Jr., kinikilala ng administrasyong Aquino ang karapatang maghayag ng saloobin sa maayos at mapayapang paraan ngunit kailangang tuparin ng mga tsuper at operator ang mga tungkulin na nakasaad sa ipinagkaloob sa kanilang prangkisa.

Giit niya, responsibilidad ng pamahalaan na ipatupad ang batas at pairalin ang kaayusan sa kapakanan ng mga mamamayan.

Rose Novenario