Street sweeper utas sa kinuhang kanin at ulam

DAHIL sa kanin at ulam, napatay ng isang 40-anyos park attendant ang isang 53-anyos street sweeper sa Luneta Park, Ermita, Maynila kamakalawa ng gabi.

Sumuko sa Manila Police District Station 5 ang suspek na si Eduardo de los Reyes, Jr., alyas Dayo, tubong Western Samar.

Nalagutan ng hininga habang nilalapatan ng lunas sa Ospital ng Maynila ang biktimang si Lorna Faedacan.

Sa imbestigasyon ni SPO1 Jose Milbert Balinggan, naganap ang insidente dakong 9 p.m. sa harap ng Manila Hotel sa Phase 2 ng Luneta Park.

“Noong isang gabi pa siya, kumuha siya ng kanin at ulam sa tindahan ni Ate Cristy, hindi siya nagpaalam sa akin, ako ang nagbabantay doon, kagabi nakainom na ako, minura na naman niya ako at sinabi pa niya na ipabubugbog daw niya ako sa kasama niya, lumiit na ang aking pasensiya,” salaysay ng suspek sa pulisya.

Ayon sa suspek, nagdilim ang kanyang paningin kaya dumampot siya ng kutsilyo at tatlong beses na inundayan ng saksak sa tiyan ang biktima.

Leonard Basilio