HATAW! D'yaryo ng Bayan hatawtabloid.com
ANG 2014 PBA Grand Slam coach na si Tim Cone ng Purefoods Star Hotdog ay magiging coach ng koponang haharap sa tropa ni Allen Iverson sa gagawing All In Charity Basketball Game na gagawin sa Mall of Asia Arena sa Nobyembre 5.
Ayon sa managing director ng PC Worx na si Michael Angelo Chua, kasama rin si Cone sa basketball clinic na gagawin ni Iverson sa umaga bago ang laro.
Pinalitan ni Cone si Robert Jaworski na umatras pagkatapos na namatay ang kanyang biyenan noong isang linggo.
Hahawakan ni Cone ang ilang mga PBA legends tulad nina Renren Ritualo at Jerry Codinera, kasama rin ang ilang mga manlalaro ng UAAP at NCAA tulad nina Kiefer Ravena, Jeron Teng, Ola Adeogun, Javee Mocon, Troy Rosario at Mac Belo.
“Excited akong makaharap si Iverson dahil noong bata pa ako, napapanood ko ang mga games niya sa Internet. Magandang experience ito,” ani Rosario ng UAAP champion NU Bulldogs na dumalo rin sa PSA Forum.
Idinagdag ni Chua na darating sa bansa si Iverson sa Nobyembre 3 kasama ang ilang mga streetballers na haharap sa koponan nina Cone.
“AI’s team will be Team Gawad Kalinga while coach Tim’s team is Team PC Worx. We will give our best and we also hope to inspire the youth through basketball,” dagdag ni Chua.
Ang mga kikitain sa All In Basketball Challenge ay mapupunta sa Gawad Kalinga at puwedeng bumili ang mga tiket sa mga sangay ng PC Worx at SM.
James Ty III
