HATAW! D'yaryo ng Bayan hatawtabloid.com
KRITIKAL ang kalagayan sa pagamutan ng isang lalaki makaraan saksakin nang inagawan niya ng asawa, sa harap ng isang saklaan kamakalawa ng gabi sa Malabon City.
Patuloy na ginagamot sa Valenzuela City General Hospital ang biktimang kinilalang si Emilio Eugenio, 50, sakla caller, residente ng 107 E. Martin St., Brgy. Santolan ng nasabing lungsod.
Habang tinutugis ng mga awtoridad ang suspek na si Etoy Aguilar, nasa hustong gulang, residente ng San Diego St., ng nasabing barangay, mabilis na tumakas makaraan ang insidente.
Batay sa ulat ng pulisya, dakong 9:30 p.m. nang maganap ang insidente sa tapat ng isang saklaan nang nakaburol na patay malapit sa bahay ng biktima.
Kabababa lamang ng biktima sa kanyang motorsiklo nang lumapit ang suspek at walang sabi-sabing pinagsasaksak si Eugenio.
Ayon sa ilang kapitbahay ng suspek, nagtanim ng sama ng loob si Aguilar makaraan iwanan siya ng kanyang asawa at tuluyan nang nakisama kay Eugenio.
(ROMMEL SALES)
