Pingris babalik sa San Mig sa Nobyembre — Cone

PINAGPAPAHINGA muna ni San Mig Super Coffee head coach Tim Cone ang kanyang pambatong power forward na si Marc Pingris sa loob ng tatlong linggo pagkatapos ng kanyang mahabang panahong pagsisilbi sa Gilas Pilipinas.

Kagagaling lang si Pingris sa kampanya ng Gilas sa FIBA World Cup at Incheon Asian Games kaya hindi muna siya pinasisipot sa ensayo ng Coffee Mixers.

“ Ping will be back for us in November,” wika ni Cone. “Our concern now without him is how the other guys continue to do the little things needed to win. Moving forward is now our approach.”

Habang nagpapahinga si Pingris ay nagsama silang dalawa ng kakampi niya sa Gilas na si Jeff Chan sa panonood ng Game 2 ng FEU-NU finals ng UAAP sa Smart Araneta Coliseum noong Miyerkoles.

Ang unang laro ni Pingris sa San Mig sa PBA Philippine Cup ay sa Nobyembre 9 kontra Barangay Ginebra San Miguel.

Maghaharap ang Mixers at Kings sa tune-up game mamaya sa Ronac Gym sa San Juan .

Ilang beses na natalo ang San Mig sa mga pre-season games sa Korea, pati na rin kontra NLEX noong isang Sabado sa Binan, Laguna.

“I don’t like the fact that we’re losing in the pre-season,” ani Cone. “But this is the reality of it all. Other teams will get better and work harder so we’ve got to work smarter and harder. Our focus is trying to win our first game (kontra Alaska sa Oktubre 22).”

Samantala, maghaharap ang San Miguel Beer at Meralco sa pagpapatuloy ng PBA Holcim Liga ng Bayan mamayang alas-5 ng hapon sa Blue Eagle Gym sa loob ng kampus ng Ateneo de Manila sa Quezon City.

Tinalo ng Beermen ang Rain or Shine, 78-77, sa Angeles City noong Setyembre 12 samantalang ginapi ng Bolts ang Ginebra, 91-79, sa Panabo, Davao del Norte noong Linggo.

Kinabukasan ay magbabanggaan ang Talk n Text at Globalport sa Legazpi, Albay.

Maghaharap sa nasabing laro ang dalawang rookies na sina Kevin Alas ng Tropang Texters at Stanley Pringle ng Batang Pier.

(James Ty III)