Humoldap sa call center agent arestado

BIGONG makatakas ang isang holdaper nang bumangga ang sinasakyan motorsiklo pagkatapos holdapin ang isang call center agent sa San Andres Bukid, Maynila, kamakalawa ng gabi.

Nabawi mula sa suspek na si Rodolfo Veros, 28, trike driver, ng 1661 Estrada St., San Andres Bukid, Maynila, ang hinablot na bag ng biktimang si Rio Rita Bayani, 33, ng Blk.1, Agua Marina St., San Andres Bukid, Maynila. Ayon kay Supt. Fernando Opelanio, commander ng Manila Police District-Police Station 6 (MPD-PS6), naganap ang insidente dakong 9:30 p.m. sa kahabaan ng Onyx St., kanto ng Jade St., San Andres Bukid.

Nag-aabang ng taxi sa center island ng Onyx St., ang biktima nang tapatan ng suspek na sakay ng pulang Suzuki motorcycle may plakang ‘for registration’ saka tinutukan ng patalim at kinuha ang bag na kinalalagyan ng Sony Experia, P24,000; pocket wifi, P2,500; mga susi at P580 cash.

(LEONARDO Basilio)