HATAW! D'yaryo ng Bayan hatawtabloid.com
SWAK sa kulungan ang isang bagitong pulis makaraan aksidenteng makabaril ng limang sibilyan sa Antipolo City kamakalawa.
Sa inisyal na imbestigasyon, nagresponde sa isang gulo sa Brgy. San Isidro si PO1 Mark Anthony Madula.
Sangkot sa naturang gulo ang bayaw ng pulis na si Angelito Abya at inaagrabyado ng mga kaalitan.
Nakasibilyan lang si Madula nang magresponde.
Sunod-sunod na nagpaputok ang pulis ngunit tinamaan ang limang residente na karamiha’y nadaplisan sa tagiliran, binti, at paa.
Kabilang sa mga nahagip ng bala ang mismong kapatid ni Madula na si Rea, at tiyahing si Yolanda Sison.
Sugatan din ang magkakamag-anak na sina Enrique, Elizalde, at Elbert Ambos na sinasabing nakaalitan ng bayaw ng pulis.
Boluntaryong sumuko si Madula dala ang kaniyang 9mm service pistol, at posibleng maharap sa kasong frustrated homicide.
