HATAW! D'yaryo ng Bayan hatawtabloid.com
KUNG merong dapat unang pumalag sa dinastiya o pamamayani ng isang pamilya sa liderato ng isang lalawigan, lungsod o bayan, dapat na ang No. 1 ay si Comelec Chairman Sixto Brillantes.
Pero ngayon, gigil na gigil ang mga mamamayan ng Aliaga, Nueva Ecija sa ulat na pakikialam ni Brillantes para hindi makaupo ang tunay na nanalong alkalde ng kanilang bayan na si Reynaldo Ordanes gayong iniutos ng Cabanatuan City Regional Trial Court Branch 30 ang writ of execution sa pagwawagi nito sa halalan noong Mayo 13, 2013.
Nagwagi si Ordanes sa kanyang protesta laban kay dating Mayor Elizabeth Vargas nang 11 boto kaya nag-isyu si Judge Virgilio Caballero ng Writ of Execution Pending Appeal pero ayaw umalis ni Vargas sa puwesto. May tsismis nga na si Brillantes ang nagdikta na magbarikada ang mga tagasuporta ni Vargas sa pangakong ‘lalakarin’ niya na mabaligtad ang desisyon ng korte. At nagaganp ito kahit may pahayag si Aliaga Municipal Administrator Emmanuel San Juan na tatalima sila sa kautusan ng hukuman.
Kilalang-kilala si Brillantes sa Aliaga dahil naging abogado siya ni Beth at ng asawa na dati ring alkalde na si Marcelo Vargas mula 2001 hanggang 2008 noong wala pa siya sa Comelec. Pinapaharap ngayon ni Brillantes sa kaso ni Vargas ang isa pang sobrang lapit sa kanya na si Atty. Kim Co ng Office of the Comelec chairman.
Mas maraming malalaking kaso na dapat harapin ang Comelec pero waring inuuna ni Brillantes ang apela ni Beth para manatiling alkalde ng Aliaga. Hindi niya alintana ang banta ng iba’t ibang sektor sa Nueva Ecija tulad ng isang grupo ng mga abogado na bukod sa isusumbong sa Office of Ombudsman at Supreme Court ay ipapa-disbar nila ang Comelec chairman dahil maraming handang tumestigo na matagal na siyang abogado ng mga Vargas.
Sana naman, sa halip mag-abogado kay Beth, unang ipaliwanag si Brillantes ang pagbili ng Comelec ng reclamation lot sa Pasay City na nagkakahalagang mahigit P300 milyon nang walang konsultasyon sa ibang komisyoner ng ahensiya. Ang tanong nga ng taga-Aliaga, bakit hindi siya magkandaugaga sa pag-ayuda kay Beth Vargas. Ano ang matinding dahilan? Tuwid na daan? Baka naman biglang liko? Tsk, tsk, tsk.
Ariel Dim Borlongan
