13-anyos HS girl ginilitan, 9 beses sinaksak ng rapist na uncle

GINILITAN sa leeg at sinaksak ng siyam na ulit ang 13 anyos dalagita ng kanyang tiyuhin na humalay sa kanya sa Parañaque City.

Inoobserbahan sa Ospital ng Parañaque ang biktimang si Dianne, 1st year high school student, ng Brgy. Tambo ng nasabing siyudad.

Sa follow-up operation ng mga pulis, agad naaresto ang suspek na si Fernando Trinidad , 53, may asawa, contruction worker, ng Garbiel St., Brgy. Tambo, Parañaque City.

Ayon kay Senior Insp. Benedicto Balagtas, dakong 9 a.m. kahapon nang maganap ang pananaksak sa loob ng bahay ng dalagita.

Nauna rito, hinalay ng suspek ang dalagita kamakalawa ng gabi na agad inireklamo ng biktima kaya naaresto ang tiyuhin.

Ngunit dahil sa panghihimasok ng ama ng dalagita na kapatid ng suspek ay hindi natuloy ang pagsasampa ng kaso laban sa tiyuhin.

Ngunit kahapon ng umaga ay naabutan ng suspek ang dalagita sa kanilang bahay habang natutulog.

Bunsod nang matinding galit, tinakpan ng suspek ang bibig ng dalagita at ginilitan siya sa leeg.

Nanlaban ang biktima kaya pinagsasaksak siya ng suspek sa iba’t ibang bahagi ng kanyang katawan.

(JAJA GARCIA)