Kabesa todas sa killer-tandem (Tinaniman ng bala sa ulo habang pula ang traffic light)

TODAS ang Barangay Chairman nang barilin sa ulo ng riding-in tandem habang sakay ng kanyang DMax sa Sampaloc, Maynila, kamakalawa.

Dead-on-the-spot ang biktimang si Rodrigo Cruz ng District 3, residente ng 2636 Severino St., Sta Cruz, Maynila sanhi ng isang tama ng bala sa tagiliran ng ulo.

Sa imbestigasyon ni SPO1 Charles John Duran, ng Manila Police District – Homicide Section (MPD-HS), dakong 11:50 p.m. nang naganap ang insidente sa panulukan ng A.H. Lacson at Dapitan streets, sa Sampaloc.

Nakaupo sa tabi ng driver ng kanyang Isuzu DMax (ZEG 123) ang biktima nang tabihan ng dalawang suspek na magkaangkas sa motorsiklo habang nakahimpil dahil sa red traffic light.

Bukod sa driver na si Danilo dela Cruz, 47, kasama sa sasakyan ng biktima ang isang kaibigan na si Norelito Taruca, 50, pero si Cruz ang tanging tinarget ng killer tandem.

Iniimbestigahan ng mga awtoridad insidente upang tukuyin ang motibo at posibleng (mga) suspek sa pagpatay.

ni LEONARD BASILIO