Amok na piyon nagbigti

BAGUIO CITY – Nagbigti ang isang construction worker makaraan magwala nang hindi sila magkaintindihan ng pinsang babae sa Purok 4, Central Fairview, Baguio City kamakalawa.

Kinilala ang biktimang si Lester Salvador Gutierez, 25, construction worker at nakatira sa nasabing lugar.

Sa imbestigasyon ng Baguio City Police Office, Stn. 1, umuwing lasing ang biktima at ang pag-uusap nilang magpinsan ay nagresulta sa hindi nila pagkakaintindihan.

Dahil dito, nagwala ang biktima at sa takot ng pinsang babae ay humingi ng tulong ng kapulisan.

Habang hinihintay ang tulong ng mga awtoridad, nagtungo ang biktima sa ikalawang palapag ng kanilang bahay na under construction, dala ang nylon cord.

Tinangkang pigilan ng kanyang tiyuhing retiradong army na si Leopoldo Ambet, 62, ang balak na pagpakamatay ng pamangkin ngunit sinuntok siya ng biktima.

Umalis ang matanda para humingi ng tulong sa mga opisyal ng barangay ngunit pagdating nila ay natagpuan nang nakabigti ang biktima sa steel trust ng bahay.