HATAW! D'yaryo ng Bayan hatawtabloid.com
DAGUPAN CITY – Dahil sa hindi pagsunod ng kanyang asawa sa kanilang kasunduang magkikita silang mag-anak, ini-hostage ng isang padre de pamilya ang kanyang misis sa bayan ng Malasique, sa lalawigan ng Pangasinan kamakalawa.
Hindi napigilan ng suspek na si Julius Palomino ang sama ng loob na nararamdaman nang hindi tumupad ang misis na iharap ang dalawa nilang mga anak sa kanya.
Nahirapan ang mga pulis na kombinsihin ang pagpapalaya sa kanyang misis na ini-hostage ng suspek sa bahay ng kanyang lola habang isinisigaw ang lahat ng kanyang mga hinanakit sa asawa.
Nang sabihin na ipasusundo ang mga anak na nasa bayan ng Calasiao nang maganap ang insidente, ay saka lamang kumalma ang suspek.
Napag-alaman, tatlong buwan nang hindi nakikita ni Palomino ang mga anak makaraan silang maghiwalay ng kanyang misis.
