Nurse tepok sa ex-BF na nagbaril din

PATAY ang isang nurse nang barilin ng dating nobyong pulis na nagpakamatay rin sa Brgy. Taslan, Tapaz, Capiz kamakalawa.

Sa imbestigasyon, tatlong tama ng bala ng baril ang tumapos sa buhay ni Jovelyn Pio, 26, nurse na kauuwi lamang sa bansa noong Agosto 15.

Namatay rin ang suspek na si PO1 Jesus Farillon, 26, pulis, makaraan magbaril sa ulo gamit ang kanyang .9mm pistol service firearm.

Ayon kay Insp. Leomendo Tayupon, hepe ng Tapaz police station, sinadyang puntahan ng pulis ang bahay ng dating kasintahan upang makipag-usap sa nobyang nakarelasyon nang halos walong taon.

Ngunit nagulat na lamang ang pamilya Pio nang makarinig ng apat na putok ng baril at natagpuan ang duguang bangkay ng dalawa.

Ayon kay Tayupon, maaaring hindi pa tapos ang problema ng dalawa makaraan mag-asawa ang pulis at nagtrabaho sa ibang bansa ang nurse.

(BETH JULIAN)