Jobless utas sa kadyot ng kaaway

TODAS sa tatlong malalalim na saksak ang isang jobless nang tarakan ng isa sa nakaalitan habang kasama ang mga kaibigan sa Tondo, Maynila, iniulat kahapon.

Hindi na umabot nang buhay bago idating sa Ospital ng Maynila (OSMA) ang biktimang si Victor Villamor, 40, walang trabaho, ng 2935 Jose Abad Santos St., Tondo, Maynila.

Pinaghahanap ng mga awtoridad ang suspek na si Jojo Arisala, alyas Bulag, na tumakas matapos ang krimen.

Sa imbestigasyon ni SPO1 Rommel del Rosario, ng Manila Police District- Homicide Section (MPD-HS), dakong 11:30 p.m. naganap ang insidente sa Bagac St., Tondo.

Nasa loob ng bahay ang biktima kasama ang mga kaibigan nang pumasok ang suspek, nakisali sa usapan hanggang magkaroon ng pagtatalo sa ‘di nabatid na dahilan.

Sa kalagitnaan ng pagtatalo, lingid sa kaalaman ng biktima, armado ng patalim ang suspek na sunod-sunod na itinarak sa kanya.

Malalimang imbestigasyon ang isinasagawa ng pulisya sa pangyayari.

(LEONARD BASILIO)