Tulak na Tsekwa timbog sa 10 kg shabu

NAARESTO ng mga operatiba ng Quezon City Police Office – District Anti-Illegal Drugs (QCPO-DAID) ang isang bigtime drug trafficker nang makuhaan ng 10 kilo ng shabu na nagkakahalaga ng P20 milyon sa isang buy bust operation kahapon sa lungsod.

Ayon kay Chief Supt. Richard Albano, QCPO director, naaresto si Xu, Zhen Zhi, 30, ng 136 Ongpin St., Binondo, Maynila dakong 3:00 p.m. sa parking lot ng isang fastfood chain sa Philcoa area, sa Commonwealth Avenue, Quezon City.

Ayon kay Insp. Roberto Razon, chief ng DAID, inaalam na nila sa Land Transportation Office (LTO) kung tunay ang nakompiskang lisensya ng suspek sabay na biniberipika ang pangalan sa Bureau of Immigration (BI).

Una nang nakaaresto ang mga tauhan ni Razon ng dalawang drug pusher sa Tarlac at nakakompiska ng isang kilo ng shabu sa buy bust operation.

Sa interogasyon sa dalawa, ikinanta nila ang pangalan ni Xu na supplier nila ng droga kaya nagsagawa ng operasyon na nagresulta sa pagdakip kay Xu.

Nakuha rin sa suspek ang 14 kilo ng shabu na nakalagay sa kanyang bag pack na nasa loob ng Toyota Vios. (ALMAR DANGUILAN)