Batilyo kritikal sa fish dealer

SUGATAN ang isang batilyo o fish porter makaraan gulpihin at saksakin ng isang fish dealer na kanyang nakasagutan kamakalawa ng gabi sa Malabon City.

Nilalapatan ng lunas sa Tondo Medical Center ang biktimang si Rey Reyes, 30, ng Estrella St., Brgy. Tañong ng nasabing lungsod, sanhi ng mga tama ng saksak ng icepick sa dibdib.

Habang agad naaresto ang suspek na si Jose Al Almudiel, 32, negosyante ng isda, ng Palmario II St., Brgy. Tonsuya, Malabon, nakapiit sa detention cell ng Malabon Police.

Sa ulat nina SPO1 Jerry Dela Torre at PO3 Jun Belbes, dakong 10:25 p.m. nang maganap ang insidente sa loob ng consignacion market sa kahabaan ng Estrella St. ng nasabing barangay.

Ayon sa imbestigasyon, nagkasagutan ang dalawa sa hindi nabatid na dahilan hanggang gulpihin ng suspek ang biktima.

Hindi pa nakontento, pinagsasaksak ng suspek ng icepick ang biktima.

Bagama’t sugatan ay nakatakbo ang biktima at nakahingi ng tulong sa kalapit na Police Community Precint (PCP-6) dahilan upang maaresto ang suspek.

(ROMMEL SALES)