Carla, lucky charm ni Mother Lily

HINDI na kuwestiyon ang husay at kakayahan ni Carla Abellana bilang artista. Hindi lang ang maganda niyang mukha ang kinagigiliwan ng publiko kundi of course pati ang kanyang pag-arte.

Simula nang bigyan ng acting break ng mag-inang Lily at Roselle Monteverde si Carla sa pamamagitan ng Punerarya episode sa Shake Rattle & Roll, isinilang ang isang bankable at dependable aktres sa kanyang katauhan. Nabigyan siya ng tropeo ng Best Performance mula sa Young Cristics Circle Award at sa 27th Star Awards for Movies ng PMPC bilang Best New Movie Actress.

Sinundan ito ng sex-drama My Neighbor’s Wife at Yesterday, Today, Tomorrow na nagbigay din sa kanya ng acting nominations.

This year, pinagkatiwalaan muli si Carla ng Regal sa pamamagitan ng pelikulang Third Eye na sinundan ng So It’s You. At ngayon isa na namang pelikula ang muling ibinigay sa kanya ni Mother Lily, ang Somebody To Love na isang romantic comedy mula sa pamamahala ni Joey Javier Reyes.

Gagampanan ni Carla ang papel ni Sabrina Madrilejos, isang ambitious at hardworking advertising creative director. Makakasama niya rito sina Matteo Guidicelli at Jason Abalos.

Bale magsisilbing birthday presentation itong Somebody To Love ni Mother Lily na mapapanood na sa Agosto 20. Tila lucky charm ni Mother Lily si Carla.