Bangkay ng GF sinilaban kelot nagsunog din (Sinakal hanggang mamatay)

NAGA CITY – Kapwa tostado na ng apoy ang katawan ng magkarelasyon nang matagpuan sa loob ng lodging house sa Goa, Camarines Sur kamakalawa ng gabi.

Nabatid na isang tawag ang ipinarating ng isang Rachel Uy sa himpilan ng pulisya hinggil sa sunog na sumiklab mula sa Room 9 ng Papelon Lodging house sa nasabing bayan.

Agad nagresponde ang mga pulis kasama ang mga tauhan ng Bureau of Fire Protection (BFP)-Goa ngunit laking gulat nila nang bumulaga sa kanila ang sunog na katawan ng isang babae at isang lalaki.

Tinatayang edad 20 hanggang 30-anyos ang dalawang biktima.

Nabatid na tatlong araw nang naka-check-in sa lodging house ang dalawa ngunit kahapon ay lumabas ang lalaki na hinihinalang bumili ng gasolinang ginamit sa krimen.

Sa inisyal na pagsisiyasat, may nakitang bakas sa leeg ng babae na posibleng sinakal muna bago binuhusan ng gasolina at sinilaban.

Pagkaraan ay sunod na sinunog ng lalaki ang kanyang sarili.

May nakuhang sachet ng shabu sa bahagi ng kwarto ng dalawa.

ni BETH JULIAN