What DAPak?

SINO ang naniniwala na malaki ang nagawa para sa taong bayan ng DAP, o Disbursement Acceleration Program?

Ito ang gustong palabasin ng pamahalaang Aquino, matapos mapahiya nang sabihin ng Korte Suprema na ilegal at unconstitutional ang DAP.

The administration says that DAP was a factor in the increase of the country’s gross domestic product, or GDP.

Hindi po tayo economist tulad ng ibang magagaling na senador o Cabinet secretary diyan, pero may kalabuan yata ito.

Pinalalabas ng ating mahal na Pangulo na gumanda ang ating ekonomiya dahil sa DAP, na kagagawan ng kanyang Budget Secretary na si Butch Abad.

‘Ika nga ng isang dating Defense secretary, teka, teka, teka.

Unang-una, bawal ang ginawa ng ating pamahalaan sa DAP na ‘yan. Nag-juggle ng pondo na parang acrobat sa circus. Ang problem lang, ayon sa ating Saligang Batas, ang Kongreso lang ang maaaring magsabi kung paano gagastusin ang buwis na nakokolekta sa taong bayan.

Gumanda nga ba ang ating ekonomiya dahil sa DAP na ‘yan?

Nang namalengke ang misis ko noong nakaraang buwan, otsenta pesos (P80) and isang kilo ng bawang. Isang buwan pa lang ang nakalilipas nag-tres siyentos singkuwenta pesos (P350) ang isang kilo ng bawang.

Kung iyan ang pag-asenso, huwag na lang po. Inyo na lang po ang pag-asenso n’yo, at ang DAP n’yo, Ginoong Pangulo.

***

SHORT BURSTS. Para sa mga komento o reaksiyon, mag-email sa firingline@ymail.com o mag-tweet sa @Side_View.

Robert B. Roque, Jr.