Abortion pills nasabat sa NAIA

NASABAT ng grupo ni NAIA Customs police chief, Capt. Reggie Tuason at Customs Anti-illegal drug task force head Sherwin Andrada ang 24,000 cytotec tablets (abortion pills) sa isang Indian national na kinilalang si Mohanty Srikant sa NAIA T-1 mula Bangkok, Thailand lulan ng Thai Airways flight TG621 kahapon. (EDWIN ALCALA)

TINATAYANG 24,000 Cytotec tablets ang nasabat ng Bureau of Customs sa isang Indian national na dumating mula sa Bangkok, Thailand lulan ng Thai Airways flight TG621 kahapon.

Ang Cytotec ay ginagamit bilang gamot sa duodenal ulcer at gastric ulcer, pero sumikat ang nasabing gamot nang gamitin ito bilang pampalaglag o abortion pills.

Ayon kay Customs police chief, Reggie Tuazon, nakatanggap sila ng impormasyon mula sa Bangkok na isang pasahero na nagngangalang Mohanty Srikant, ang may dalang 24,000 tableta na ipinagbabawal ng Food and Drugs Administration.

Nabatid kay Customs anti-illegal drugs head Sherwin Andrada na padating si Srikant sa NAIA terminal 1, kaya ipinosisyon na ang Customs operatives malapit sa naturang pasahero.

Nang kunin ni Srikant ang kanyang black trolley bag sa baggage carousel, saka naglapitan ang mga awtoridad sa Indian national.

Agad inimbitahan para sa interogasyon at inspeksiyon ng bagahe. (GLORIA GALUNO)