Lapu-Lapu, dapat lang sa isla ng Mactan!

TAMA NAMAN si Lapu-Lapu City Mayor Paz Radaza na nararapat lamang na itayo ang 40-foot monument ni Lapu-Lapu sa mismong isla ng Mactan na unang nanindigan ang ating lahi laban sa dayuhang mananakop.

Balak ni Mayor Radaza na itatayo ang nasabing bantayog ng kauna-unahang mandirigmang Asyano na lumupig sa mga dayuhan sa Mangal Point na ipinangalan sa ama ni Datu Lapu-Lapu.

Ayon kay Mayor Radaza, magiging sentro ito ng atraksyon na pupuntahan ng mga local at dayuhang turista at magsisilbing oportunidad sa kabuhayan para sa mga residente ng Lapu-Lapu City. Nais ng alkalde na tulad ng Statue of Liberty sa New York, USA, ay magkaroon ng disenyo ng isang munting isla sa dulo ng Barangay Engano. Pero kontra sa planong ito si Congressman Raul del Mar ng Cebu City at ayaw niyang ilipat ang bantayog ni Lapu-Lapu na kasalukuyang nasa Rizal Park.

Take note ha, Rizal Park kaya bakit nga naman andun si Lapu-Lapu? Bakit ba ayaw ni Del Mar na lalong sumigla ang turismo sa siyudad ng Lapu-Lapu? Di pa nga niya nasagot kung gaano katotoo na sabit din siya sa pork barrel scam na nabuking nang magsagupaan ang magtiya na si Janet Lim-Napoles at Benhur Luy?

Panahon na upang maibalik si Lapu-Lapu sa kanyang lupang tinubuan.

Junex Doronio