SA NAPIPINTONG balasahan ng mga opisyal at mga ahente ng Customs
Intelligence and Investigation Service (CIIS), masasabing panibagong
hamon ang bagong komposisyon nito sa Bureau of Customs (BoC) Port of
Cebu.
Ayon sa ating bubuyog, ililipat sa Port of Davao ang kasalukuyang CIIS
chief Ms. Arneth Von Manquiquis samantalang ang papalit sa kanya ay si
Diego Santiago. Maging ang kaibigan nating si “Erning” ay ‘di
nakaligtas at aniya ay sa Port of Tacloban naman siya ililipat kung
kaya nabiro ko siya kung meron pa bang Customs sa naturang siyudad na
lubhang napuruhan ng superbagyong Yolanda na sinabihan lang ni Mar
Roxas na: “Bahala kayo sa buhay n’yo!”
Napag-alaman na umabot sa 142 officers and staff ang apektado sa
nasabing balasahan alinsunod sa Customs Personnel Order (CPO) No. B-
42-2014 bilang bahagi na masawata raw ang korupsyon sa BoC. Mismong si
Deputy Commissioner Jessie Dellosa ang lumakad na maaprubahan ang
nasabing “rotation” na humagip sa mahigit 80 porsyento ng intelligence
personnel.
Samantala, umugong naman ang sitsit na nag-resign na raw si Finance
Secretary Cesar Purisima at magkakaroon din kuno ng balasahan sa hanay
ng district collectors. Hindi pa natin makompirma ang naturang
alingawngaw at mukhang okey naman ang pamamalakad ni District
Collector Roberto Almadin sa Port of Cebu.
Nananatili siyang kalma at matatag sa kanyang pamumuno sa kabila ng
isyu ng 12 container vans ng relief goods mula Belgium para sa mga
biktima ng “Yolanda” na limang buwan nang NAKATANGGONG sa Cebu
International Port dahil hindi sinunod ng mga donors ang mga
alintuntunin ng mga donasyon.
Junex Doronio