P1-B pondo, kontrata sa basura ng Laguna sinalamangka ni ER?
UMABOT sa isang bilyong pisong pondo ng lalawigan ng Laguna ang hindi
maipaliwanag kung saan ginasta ng administrasyon ng dating gobernador
na si ER Ejercito.
Sabi nga ng bagong upong gobernador na si Ramil Hernandez, walang
masamang mangutang, pero dapat ilagay sa maganda ang pera.
Ngayong si Hernandez na ang timon sa Laguna ay dapat niyang
paimbestigahan ang mga transaksiyon na pinasok ng ER administration,
lalo na ang kontrata sa basura dahil napabalitang ito ang “milking
cow” o gatasan ng angkan ng mga Estrada.
Sino ba ang masuwerteng contractor ng basura sa Laguna sa panahon ni
ER?
Kailangan din ipabusisi ni Hernandez kung ang mga nakatalang
proyektong pinondohan ay talagang naipatupad para malaman kung ang mga
ito ba’y “ghost project.”
Alam naman ni Hernadez na responsibilidad niya sa mga taga-Laguna na
tiyakin kung ginastos at gagastusin nang wasto ang budget ng
lalawigan, at mukhang may “balls” naman siyang gawin ito kahit sino pa
ang tamaan.
Kung si ER ay pinsan ni Sen. Jinggoy na sangkot sa pork barrel scam at
pamangkin siya ng convicted plunderer na si Erap, hindi nakapagtataka
kung may ‘dugong mandarambong’ din na nananalaytay sa kanyang katawan.
PATI ANG DEPENSA
NI JINGGOY, BASURA
PARA kay Jinggoy, malaking kasalanan ng estado na papanagutin siya sa
pork barrel scam, batay sa katuwiran na may iba rin naman tulad nila
nina Sens, Juan Ponce – Enrile at Bong Revilla nanggahasa sa kaban ng
bayan.
“If they would jail us, they should also be jailed. It should not be
always just the three of us,” sabi ni Jinggoy tungkol sa pagdawit ni
Janet Lim-Napoles kay Budget Secretary Butch Abad at iba pang opisyal
ng administrasyong Aquino.
Kailan pa siya nagkaroon ng kapangyarihan na diktahan ang gobyerno
kung ano ang dapat gawin, at kung may hawak siyang mga ebidensiya,
bakit hindi siya ang maghabla sa mga tinutukoy niyang opisyal ng
pamahalaan?
Hindi ba kataka-taka na mula nang mabulgar ang P10-B pork barrel scam,
ni isang beses ay hindi kinondena ni Jinggoy si Napoles bilang
mastermind sa anomalya, at ngayon ay gusto pa niyang gawing bida na
lahat ng sabihin ay ituring na katotohanan ng gobyerno at publiko?
Nakalilimutan na ni Jinggoy na bilang senador ay tungkulin niyang
tiyakin na ang ipinagkatiwala sa kanyang P200-M Priority Development
Assistance Fund (PDAF) kada taon ay gastusin sa totoo at wastong
proyekto.
May mga dokumentong mula sa iba’t ibang ahensiya ng pamahalaan na
nagpapatunay na si Jinggoy mismo ang nagrekomenda na ilagak ang
kanyang PDAF sa mga proyekto na ipatutupad ng mga pekeng non-
government organizations (NGOs) ni Napoles.
Ibig sabihin, bago niya ginawa ito’y nag-usap at nagkasundo na sila ni
Napoles.
Bakit lumago ng 133% ang yaman ni Jinggoy mula 2007-2012 o sa panahong
senador na siya at magkaibigan na sila ni Napoles?
Ito ang mga dahilan kaya siya kinasuhan ng plunder o pandarambong at
dapat ipaliwanag ni Jinggoy ang kanyang panig sa paglilitis sa
Sandiganbayan at hindi sa mga bayaran niyang media.
Kelan pa naging depensa sa hukuman ang magturo ng ibang may kasalanan
o kaya’y ang pagsasabing pinopolitika lang siya ng administrasyon?
RALLY BA O DESTAB?
NAGDEDELIRYO na ang mga akusado sa P10-B pork barrel scam sa nalalapit
na pagbalik sa bansa ni Ombudsman Conchita Carpio-Morales mula sa US
study tour at sa nakatakdang pagsasampa ng kasong plunder sa
Sandiganbayan laban kina Jinggoy, Enrile, Revilla, Estrada, Napoles at
Gigi-Reyes.
Kaya naman puspusan na rin ang kanilang kampanya na ilarga ang
destabilisasyon laban sa administrasyong Aquino para maunsyami ang
pag-aresto sa kanila at matuon ang atensiyon ng publiko sa mga
anomalya ng ibang opisyal ng gobyerno na anila’y hindi inaaksiyonan.
Kung kakagatin ng publiko ang propaganda ng grupong ito at lalambot
ang administrasyon, walang mapaparusahan kahit isa sa mga nagnakaw sa
kaban ng bayan, sa hinaba-haba ng pakikibaka ng sambayanan laban sa
katiwalian.
Sa rami kasi ng salaping nasandok ng tatlong senador ay may kakayahan
silang pondohan ang mga ganitong pagkilos kontra sa pamahalaan para
mawala ang focus at atensiyon ng publiko sa mga nagawa nilang
kasalanan sa bayan.
Kaya bago lumahok sa mga rally, isip-isip din muna pag may time at
gamitin and sentido-kumon upang hindi mauto na pagsisihan naman sa
bandang huli!
(Para sa anumang sumbong at reaksiyon, mag-text o tumawag sa
09174842180. Maaring ipadala ang inyong liham sa e-mail address:
Percy Lapid
