HATAW! D'yaryo ng Bayan hatawtabloid.com
ANG Priority Development Assistance Fund (PDAF) o pork barrel at ang Disbursement Acceleration Program (DAP) ay mga pondong nagpapatunay na mayroong malalang korupsiyon sa bansa.
Ang siste, ang dalawang pondo na ‘yan ay hindi nagsilbi para matugunan ang mga napapabayaang bahagi o baryo sa ating bansa na higit kanino man, ang mga mamamayan doon ang nangangailangan ng mga kagyat na tulong.
Ang PDAF at DAP ay tunay na nagsilbi sa mga politikong marunong magmaniobra ng pondo. Pwedeng nagagamit nila ito para pabanguhin ang kanilang mga pangalan o kaya naman ay para pakapalin ang kanilang mga bulsa.
At ang katotohanang ‘yan ay sumambulat sa mukha ng mamamayan.
Sumambulat sa administrasyon ng isang Pangulo na nagsasabing siya ay nagsusulong ng anti-corruption drive sa pamamagitan ng kanyang slogan na DAANG MATUWID.
Pero ang Pangulo na ‘yan na nagsasabi rin na anak siya ng dating Pangulong Cory Aquino na sinabing democracy icon at dating Senador Benigno Aquino III na sinabing freedom fighter ay nayanig matapos ideklara ng SC na illegal ang bilyones na DAP sa ilalim ng kanyang tanggapan.
Hindi kayang putulin ng PDAF at DAP ang cycle of corruption sa bansa.
Hangga’t marami ang walang trabaho at marami ang nagugutom, maraming hindi nakapag-aaral at namamatay na hindi nakakikita ng doktor o ospital hanggang mamatay … nanatili ang korupsiyon sa bansa.
Hangga’t ang yaman ng bansa ay pinakikinabangan lamang ng iilan at nasa kanila ang sandamakmak na kwarta hindi mamamatay ang korupsiyon sa bansa.
Kahit ilang SLOGAN pa ang ipamarali ni Noynoy kung hindi ito naisasakatuparan — walang pagbabagong magaganap sa lipunan.
Sa daang matuwid — dead end ang kahahantungan ng kampo ni Noynoy.
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
