HATAW! D'yaryo ng Bayan hatawtabloid.com
INAASAHAN nang matatanggalan ng lisensya bilang abogado si Commission on Elections (COMELEC) Chairman Sixto Brillantes, Jr., at lima pang commissioners matapos aprobahan ng Korte Suprema ang disbarment case na isinampa ng Alab ng Mamamahayag (ALAM) laban sa anim na opisyal.
Kasama ni Brillanters sa mga inaprobahan na i-disbar sina Commissioners Rene Sarmiento, Lucenito Tagle, Armando Velasco, Elias Yusoph at Christian Robert Lim.
Nag-ugat ang reklamo matapos ang ibinabang desisyon ng mga nasabing opisyal ng Comelec na pagtanggal sa pangalan ng ALAM sa partylist ballot para sa 2013 elections.
Ang ginawang pagtanggal sa pangalan ng ALAM sa PCOS ballot ay maituturing na matinding insulto sa dignidad at dangal ng Kataas-taasang Hukuman dahil nauna nang nagpalabas ng Status Quo Ante order (SQAO) na nag-uutos sa lahat ng partido, kabilang ang Comelec na panatilihin ang katayuan ng mga partido bago ang pagpapalabas ng kautusan sa hindi pagbibigay ng aplikasyon para sa accreditation at pakikilahok sa 2013 halalan.
Ang kanilang ginawa ay malinaw na paglabag sa Lawyer’s Oath na kanilang susundin nang tapat ang mga awtoridad na itinadhana ng batas gaya ng Korte Suprema.
Ipinagtanggol ng Office of the Solicitor General (OSG) ang mga respondent, maliban kay except Commissioner Lim na kumuha ng sariling abogado para katawanin siya sa Korte Suprema.
Kinuwestiyon ng ALAM ang pagtatanggol ng OSG sa Comelec officials dahil ang nilabag nila ay sariling batas ng bansa.
Inatasan ng Supreme Court ang Integrated Bar of the Philippines (IBP) na magsagawa ng pagdinig para sa proseso ng disbarment.
Itinakda ng IBP ang pagdinig sa Mandatory Preliminary Conference sa Hulyo 30, 2014 ganap na 10:00 a.m. sa IBP Headquarters, Julia Vargas Ave., Pasig City.
HATAW News Team
