HATAW! D'yaryo ng Bayan hatawtabloid.com
IBANG klase palang maging fan at matuwa si Mother Lily Monteverde. Talagang gumagastos siya at ibinibigay niya ang anumang tulong para sa artista/singer na nais niyang tulungan.
Ito bale ang ginawa niya kay Gary Valenciano. In-offer niya ang kanyang restaurant sa dating bahay sa Valencia, Quezon City para gawin na agad ang presscon ng Arise Gary V 3.0 The Repeat na gagawin naman sa SM Mall of Asia Arena sa August 2 (Sabado).
Mistulang fans talaga si Mother Lily lalo na nang handugan siya ng kanta ni Gary, ang Sana Maulit Muli (na isinulat ni Angeli at nilapatan ng musika ni Gary. Themesong ito ng pelikulang Ibulong Mo Sa Diyos ni Vilma Santos na ipinrodyus ng Regal Films) na tila tin-edyer si Mother na nilapitan si Gary para bigyan ng flowers at nagpa-picture pa.
Ayon kay Angeli Pangilinan, asawa at manager ni Gary, sobrang natuwa si Mother Lily nang mapanood nito ang singer sa nakaraang concert ni sa Smart Araneta. “Naku kaya after we arrived from the States, nag-occular inspection na agad kami rito sa lugar. Kasi nga in-offer ni Mother itong place at agad-agad gusto niyang magpa-presscon na si Gary para sa repeat nga ng concert niya.”
Anyways, ang repeat ng Arise Gary V 3.0 ay dahil na rin sa dalawang gabing very successful concert ni Gary noong Abril sa Smart Araneta. Na talaga namang marami ang humanga na sa loob ng 30 taon, eh kaya pa rin ni Gary na pumuno ng Araneta at maghandog ng isang napakagandang show. Kaya hindi kataka-taka na bukod kay Mother Lily, marami pang kapwa niya artista ang saludo sa kanya at humanga sa katatapos niyang concert noong Abril.
Sa August 2, muling ipakikita ni Gary ang talento bilang total performer at kung ano ang bago niyang ihahandog dito, ‘yun ang dapat nating abangan kaya watch na kayo. Makakasama niya rito ang kanyang anak na si Kiana Valenciano, ang rock icon na si Rico Blanco, Iya Villana at Sam Concepcion. Siyempre nariyan pa rin ang Manouevers, super Selfie King at international online sensation Gab Valenciano. At siyempre ididirehe pa rin ito ng kanyang super gwapo at napaka-talented na anak na si Paolo Valeciano.
