HATAW! D'yaryo ng Bayan hatawtabloid.com
NAGLABAS ng babala ang PAGASA ukol sa malakas na buhos ng ulan at pagbaha sa ilang bahagi ng Metro Manila.
Ayon sa PAGASA, epekto ito ng papalapit na low pressure area (LPA) na nasa silangang bahagi ng ating bansa.
Sinabi ni PAGASA forecaster Alvin Pura, inaasahang tatagal ang malakas na buhos ng ulan hanggang gabi kaya pinapayuhan ang mga residente ng mabababang lugar na manatiling alerto ukol sa posibilidad ng pagtaas ng level ng tubig.
Kahapon ay nagpa-iral ng yellow rainfall warning ang weather bureau, indikasyon nang higit sa karaniwang antas ng ulan sa ilang lugar sa National Capital region (NCR).
Samantala, bumaha sa ilang lugar ng Metro Manila at kalapit na mga lalawigan makaraan bumuhos ang malakas na ulan kahapon ng hapon.
Ayon sa state weather bureau PAGASA, apektado ng thunderstorm ang Orani, Samal at Abucay sa Bataan, Metro Manila, Bulacan, Zambales, at iba pang bahagi ng Cavite, Pampanga at Nueva Ecija.
Itinaas din ng PAGASA sa yellow rainfall alert ang Quezon, Laguna, at Batangas dakong 3:45 p.m.
Sa yellow rainfall alert, posibleng magkaroon ng pagbaha sa mababang mga lugar.
Kasalukuyan mino-monitor ng PAGASA ang low pressure area (LPA) sa Eastern Samar.
Sa Metro Manila, ilang bahagi ng EDSA — Magallanes northbound at southbound, Orense northbound, at Estrella southbound – ang binaha bunsod ng buhos ng ulan.
Sa tweet ngMMDA, inihayag na bumaha rin sa Pasong Tamo sa Makati, at Araneta Avenue.
Habang hanggang gutter ang baha malapit sa SM Megamall. (HNT)
