HATAW! D'yaryo ng Bayan hatawtabloid.com
KRITIKAL ang kalagayan sa pagamutan ng isang 57-anyos floor manager makaraan saksakin ng waiter na kanyang sinermonan kamakalawa ng gabi sa Valenzuela City.
Nilalapatan ng lunas sa Valenzuela Medical Center ang biktimang si Joebert Montes, ng A. Pablo St., Fortune 1, Brgy. Gen. T. De Leon ng nasabing lungsod.
Naaresto ng dumaan na traffic enforcers ang suspek na si Randy Villaran, 26, ng Kalaw St., Ermita, Maynila, nahaharap sa kasong frustrated homicide.
Sa ulat ni PO3 Edwin Mapula, dakong 7:15 p.m. nang maganap ang insidente sa tapat ng Joesa Entertainment bar sa McArthur Highway, Brgy. Karuhatan.
Nakatayo ang suspek sa labas ng bar nang lapitan ng biktima at pinagsabihan kaugnay sa hindi maayos na trabaho.
Humantong ito sa mainitang pagtatalo hanggang kumuha ng patalim ang suspek at sinaksak ang biktima.
(ROMMEL SALES)
