Academy of Rock, nagbigay-tulong sa Bantay Bata

ni Maricris Valdez Nicasio

FRESH na fresh ang aura ni Yeng Constantino nang humarap ito sa amin kamakailan para sa presscon ng Academy of Rock album launching at mini concert kasama ang mga estudyante ng AOR na ginawa sa Wa Fu restaurant.

Suot-suot ni Yeng nang oras na ‘yon ang kanilang engagement ring at kitang-kita na super in-love ito sa kanyang BF na si Yan Asuncion. Kaya naman nasabi nito na hindi dapat matakot ang sinuman sa kasal at commitment dahil isa itong magandang bagay.

Nais kasi ni Yeng na maging inspirasyon sa mga kabataanat nais niyang maalis ang takot sa sinumang nagnanais mag-asawa. ”Ang pagpapakasal o desisyon na maging commited sa someone na mahal mo ay isang magandang bagay. Kaysa mag-enter ka sa isang relationship na not honoring God and of course hindi rin makabubuti sa ‘yo,”aniya.

Samantala, iginiit pa ni Yeng na hindi niya babaguhin ang klase o tipo ng kanyang musika sakaling mag-asawa na siya. Ito raw kasi ang nagustuhan sa kanya ng fans kaya walang rason para baguhin niya ang genre ng kanyang music na tunog teen-ager.

Sa kabilang banda, lumipad patungong Singapore si Yeng noong May 13-14 para i-renew ang kontrata niya bilang ambassador ng AOR, pagre-record ng bago niyang single, at ang shooting ng music video para sa The Next Step Volume 2 album.

Ang The Next Step Volume 2 album ay produce ng AOR bilang parte ng AOR Outreach Program sa 2014. Ang proyektong ito ay batay sa paniniwala ng AOR at pangako nila sa Corporate Social Responsibility na lahat ng kikitain nito mula sa digital at physical sales ng awitin ay direktang mapupunta sa Bantay Bata Foundation ng ABS-CBN. Ang slogan ng album ngayon ay Lend Us A Hand, Gkikve Them A Hope. Ang napili namang theme ay Diversity.

Ang The Next Step Volume 2 album ay internal production ng mga estudyante at guro o miyembro ng AOR. Ang carrier single naman ng album na ito ay ang Seenzoned ni Yeng.