HATAW! D'yaryo ng Bayan hatawtabloid.com
ANG mga convicted criminals ba ay may karapatang magpa-doktor o magpa-ospital sa labas ng National Bilibid Prison (NBP) nang walang kaukulang permiso mula sa Korte?!
Itinatanong po natin ito, matapos maipaabot sa atin ng mga mapagkakatiwalaang impormante na patuloy na nakatatanggap ng VIP treatment ang mga convicted criminals lalo na ‘yung nasa Maximum Security Compound.
Ang ibig pong sabihin ng Maximum Security Compound (MSC) ‘e ‘yung delikado o high risk prisoners.
Ilan po d’yan ang kagaya ni Ricardo Camata a.k.a Chacha, convicted drug lord, commander ng Sigue-Sigue Sputnik Gang na pinayagang magpa-ospital sa Metropolitan Hospital sa Tondo, Maynila.
Nitong Mayo 14 naman, inilabas ang isa pang convicted drug lord na si Amin Buratong, sa MSC, para dalhin sa Medical City sa Pasig para ipa-check-up daw ang coronary artery disease at fatty liver. Tumagal nang isang linggo ang medical check-up ni Buratong sa nasabing ospital.
Nito naman nakaraang Mayo 27, isinugod sa Asian Hospital Medical Center sa Filinvest, Alabang, Muntinlupa City si Herbert Colango alyas Ampang dahil sa urinary tract infection (UTI).
Wala naman sigurong masama kung tugunan man ang pangangailangang-medikal ng convicted drug lords, kasama pa rin naman ‘yan sa human rights nila.
Ang kwestiyon lang natin, sila ba ang dapat magdesisyon kung saang ospital sila dadalhin?!
‘E may binubuno nga silang sentensiya dahil sa malalang paglabag sa batas ‘di ba?
BuCor Director FRANKLIN BUCAYU, bakit ang mga high risk criminals ang nasusunod kung saang ospital sila dapat dalhin!? ‘E planado nap ala ang pagtakas ng mga ‘yan?
Kung mayroon man silang pambayad sa ospital. Aba ‘e doon sila i-confine sa ospital ng gobyerno at ipasok sa PAYWARD para pagkitaan naman sila ng pamahalaan.
O kaya doon sila ipasok sa military o PNP hospital, nang sa gayon ay nababantayan ang mga kilos nila!
Masyado naman yatang namimihasa at napakaimportante ang mga ‘kriminal’ na ‘yan sa administrasyon mo Director Bucayu!?
Ang kaso ni Janet Lim Napoles, bagama’t tutol tayo sa pagdadala sa kanya sa isang komportableng ospital, ay kauna-unawa pa rin dahil hindi pa naman siya convicted.
‘E ‘yung mga nauna natin binanggit, mga convicted drug lord ‘yan na maraming sinirang buhay at pamilya, tapos bibigyan ng ganyang privilege?!
Sonabagan!!!
Ano na ba talaga ang nangyayari sa justice system natin?!
Secretary Leila De Lima, Madam, umaalagwa na naman ang Bureau of Corrections (BuCor), hihintayin mo na naman ba ang malaking eskandalo bago ka umaksiyon?!
Ay sus!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
