Simon nagbida sa ratsada ng San Mig

ISANG dahilan kung bakit nangunguna ngayon ang San Mig Super Coffee sa ginaganap na PBA Governors’ Cup ay ang mahusay na laro ni Peter June Simon.

Napili ng PBA Press Corps si Simon bilang Player of the Week para sa linggong Mayo 26 hanggang Hunyo 2 dahil sa kanyang kontribusyon sa tatlong sunod na panalo ng Mixers at makuha ang liderato sa kartang apat na panalo at isang talo.

“Sabi lang ni coach (Tim Cone) na kailangang maging aggressive sa offense at defense,” wika ni Simon.

“Nakita naman namin talaga na medyo pagod din, pero ang maganda kapag nalabanan mo yung pagod, napakasarap ng feeling. Eh ito ang maganda eh, kapag nananalo ka, nakakawala ng pagod.”

Noong Mayo 27 ay humataw si Simon ng 22 puntos upang pangunahan ang San Mig sa 108-90 na pagdispatsa sa Meralco at pagkatapos ay nagdagdag siya ng 24 puntos sa 92-82 panalo ng Mixers kontra Globalport noong Mayo 30.

At noong Linggo ng gabi ay tumipa si Simon ng 19 puntos sa 102-90 tagumpay ng Mixers kontra Barangay Ginebra San Miguel sa pagdiriwang ng kanyang ika-34 na kaarawan.

(James Ty III)