Tsinoy trader todas sa ambush

PATAY ang Chinese-Filipino businessman na si Jason Chua makaraan tambangan ng riding in tandem sa P. Ocampo St., Malate, Maynila kamakalawa ng gabi. (ALEX MENDOZA)

PATAY ang 44-anyos negosyanteng Tsinoy nang tambangan ng riding in tandem habang sakay ng kanyang luxury car  sa Malate, Maynila, iniulat kahapon.

Namatay noon din sanhi ng tama ng bala ng kalibre .45 baril, ang biktimang si Jason Chua , may asawa, ng 1322 Golden Empire Tower, Roxas Boulevard.

Sa imbestigasyon ni Insp. Steve Casimiro, ng Manila Police District-Crimes Against Persons Investigation  Section, naganap ang pananambang sa panulukan ng P. Ocampo at Mabini Sts., dakong 10:10p.m.

Sa report ng pulisya, galing si Chua sa reunion nila ng high school classmates mula China sa Century Seafood Restaurant sa Malate.

Sa ulat, binabaybay ng biktima ang P. Ocampo St., lulan ng Range Rover (ZI-1055), papauwi sa tinutuluyang condo, nang biglang sumulpot ang mga suspek saka pinagbabaril ang sasakyan ng biktima. (l. basilio)