Senglot na anak todas sa tarak ng ama

ZAMBOANGA CITY – Sumuko sa himpilan ng pulisya ang isang 54-anyos ama makaraan masaksak at mapatay ang kanyang sariling anak sa loob mismo ng kanilang bahay sa Brgy. Kagawasan, Pagadian City.

Ayon sa report ng Pagadian City police station, kinilala ang amang suspek na si Longerciano Traya habang ang napatay niyang anak ay si Jerry Traya, 26-anyos.

Nabatid na umuwing lasing ang biktima at mainitang nakipagtalo sa ama na humantong sa pananaksak.

Isinugod sa Zamboanga del Sur Medical Center ang biktima ngunit binawian ng buhay.

Nakapiit na sa selda ng Pagadian City police station ang suspek habang inihahanda ng pulisya ang isasampang kaso laban sa kanya sa korte.