HATAW! D'yaryo ng Bayan hatawtabloid.com
KINOMPIRMA ng Silang municipal police station na walong pinaghihinalaang mga holdaper ang napatay sa pakikisagupa sa mga pulis dakong 2 p.m. kahapon sa Brgy. Litlit, Silang, Cavite.
Ayon kay Cavite Provincial Police director, S/Supt. Joselito Esquivel, siyam na mga suspek ang sakay ng apat na motorsiklo.
Papasukin sana ng mga suspek ang isang hardware store sa Brgy. Litlit dakong 1:30 p.m. kahapon.
Ngunit may nakapagbigay ng tip sa mga awtoridad.
Ayon kay Esquivel, agad silang bumuo ng team at naglunsad ng operasyon kasabay ng paglagay ng checkpoint upang makorner ang mga suspek.
Habang palapit sa checkpoint, binalewala ng mga suspek ang mga awtoridad at nagpaputok na naging sanhi ng shootout.
Sinabi ni Esquivel, sa siyam na mga holdaper, ang walo ay agad napatay ng mga awtoridad habang nakatakas ang isa pang salarin.
