HATAW! D'yaryo ng Bayan hatawtabloid.com
NEGOSYO ang hinihinalang motibo sa pagpatay sa tatlong Koreano sa loob ng Lapu-Lapu City sa lalawigan ng Cebu kamakalawa ng gabi.
Natagpuang patay sa loob ng Han Ga Wi restaurant sa Brgy. Maribago sa Lapu-Lapu City dakong 5 p.m. kamakalawa ang mag-asawang sina Ho An at Kim Soonok, at ang anak nilang si Young Mi An.
Ayon kay Chief Insp. Conrado Manatad, Lapu-Lapu City Station 2 chief, ang bangkay nina Ho An at Kim Soonok ay natagpuan sa labas ng restroom habang ang katawan ni Young Mi An ay natagpuan malapit sa kusina.
Ang tatlong biktima ay pawang may mga saksak sa kanilang katawan.
Natagpuan ang suspek na mister ni Young Mi An na si Kim Se Wong, sa upper floor na may laslas sa magkabilang pulso, hinihinalang nagtangkang magpakamatay.
Ang suspek na nilalapatan ng lunas sa Vicente Sotto Memorial Medical Center, ay kakasuhan ng kasong parricide at multiple murder bunsod ng insidente.
